Gaane miaksyon sa reklamo sa taga-Zone 2, brgy Cugman

Gitakdang ipahigayon sa sunod semana ang ocular inspection dinha sa Zone 2, barangay Cugman, ning syudad.

Kini ang nauyonan sa komite sa panglawas ni konsehal Malou Gaane human sa tigom kagahapong adlawa nga nagtuki sa reklamo sa mga residente sa Zone 2, Cugman batok sa AJ Wood Construction and Development Corporation.

Ang mga molopyo mireklamo sa kabaho nga giingong naggikan sa maong planta nga nakaapekto sa ilang panglawas ingon man ang giingong daling pagbaha sa dapit gumikan sa natukod nga straktura sa AJ Wood Construction.

Sa tigom, si kapitan Ricardo Pacheco mibutyag nga ila nang giduso sa DENR ug mga hintungdang ahensya ang maong reklamo apan wala pa silay nadawat nga tubag ug rekomendasyon.

Hinuon, iyang giangkon nga gawas sa kakulangon sa drainage sa dapit, dali lang motaas ang tubig ilabina kun kusog ang ulan ug magtaob usab ang suba.

Samtang ang kadagkoan sa AJ Wood mipasabot nga ang nahisgotang Zone 2 daan nang catchbasin sa Malasag ug gawas kun ma-elevate kini, kanunay gayud nga bahaan ang dapit.

Niini, si Gaane misugyot sa pagpahigayon og ocular inspection kuyog sa mga representante sa buhatan sa CLENRO, City Health, Building Official, City Engineer’s, City Administrator, City Legal, Permits and Licensing Division sa buhatan sa mayor, konseho sa Cugman, Department of Health ug Geohazard Assessment and Mapping ug Environmental Management Bureau sa DENR.