Calamity aid sa mga biktima sa sunog sa Bonbon gihangyo

Konsiderahon sa komite sa social services ni konsehal Reuben Daba ang resolusyon nga gipalabang sa konseho sa barangay Bonbon, ning syudad.

Kini naghangyo sa konseho ug ni Mayor Oscar Moreno paggahin og igong pundo isip financial assistance ngadto sa mga biktima sa sunog sa ilang abrangay niadtong Disyembre 29, 2017.

Nasayran nga pipila ka mga pamilya ang naapektohan sa maong trahedya kansang mga panimalay naugdaw sa maong sunog.

Ilang gihangyo nga magahinan sa igong kantidad ang maong lakang nga kuhaon gikan sa Calamity Fund 2017.

Malaumon ang barangay nga pinaagi niini mahatagan sa dyutayng alibyo ang kalisod nga nasinati sa mga biktima labina niining panahon sa kalisod.

Niini, ang komite ni Daba naglaraw sa pagpatawag og tigom sunod semana aron hisgutan ang maong lakang uban sa mga hintungdang departamento sa City Hall. (Yonggals)