Daba misugyot maamendar regulasyon sa outdoor advertisements, billboards

Sa tinguha nga mamintinar ang kaanyag sa palibot ingon man madugangan ang kita sa panudlanan sa dakbayan, si konsehal Reuben Daba misugyot pag-amendar sa Billboard Ordinance.

Sa sesyon sa konseho niadtong Lunes nga gidumala ni bise mayor Kikang Uy, si Daba mipadayag sa iyang namatikdang nagkadagko nga mga billboards ug uban pang outdoor advertisements sa palibot sa syudad.

Ato mang masabtan ang pagpanginahanglan sa agresibong pagpasundayag sa mga produkto ug serbisyo pinaagi sa pag-instalar sa mga dagkong billboards apan angayan usab hunahunaon nga dili kini makadaut sa natural view ug scenic backdrops sa skyline ug cityscape, pasabot sa konsehal.

Gikinahanglan nga mabalanse ang positibo ug negatibong impluwensya sa mga outdoor advertising nga dili usab makadaut sa palibot, pamahayag ni Daba.

Sa gisugyot nga kausaban ni Daba,gisugyot nga mga regulated areas mao ang mga tulay sa tinguha nga dili mababagan ang talan-awon Macajalar Bay, Camiguin Island, kabukiran ug uban pang cityscape ug skyline sa syudad.

Gitumbok niini mao ang Ysalina Bridge, JR Borja Bridge, Maharlika Bridge, Puntod-Kauswagan Bridge, Pelaez Bridge, Macabalan-Bonbon Bridge ug Kagay-an Bridge.

Ang taho ni Daba giduso ni bise mayor Uy ngadto sa komite sa ways and means ni konsehal George Goking ug komite sa panalapi ni konsehal Edna Dahino alang sa makuting pagtuon ug rekomendasyon.