Lakang matitulohan mga lote sa dakbayan gisuportahan

Paborableng gisuportahan sa komite sa subdivision ni konsehal Dometilo Acenas ang lakang nga matitulohan tanang mga loteng gipanag-iyahan sa kagamhanan sa dakbayan.

Kini human ang komite nagtigom kagahapong adlawa ug mituki sa hangyo ni mayor Oscar Moreno nga mapalabang ang ordinansa nga maghatag kaniya og katungod pag-apply og Special Patents alang sa maong katuyoan.

Lakip sa gitumbok nga matitulohan mao ang loteng gigamit nga Gaston Park, ang lote diin nahimutang ang City Hall, Postal Office, CdeO Central School, Cogon Market ug Cagayan de Oro City Jail didto sa barangay Lumbia.

Nasayran nga hangtod sa kasamtangan wala gayuy titulo ang maong mga lote taliwala nga gipanag-iyahan kini sa dakbayan, pasabot sa mayor.

Niini, si konsehal Acenas nagtahas sa mga buhatan sa City Assessor, City Engineering ug City Legal pagsumete sa ilang panahom ug opinyon kalabot sa maong lakang sa labing daling panahon.