Suzette mangulo sa Task Force Coliform

Si konsehal Suzette Magtajas-Daba ang gitudlong mangulo sa gimugnang Task Force Coliform aron mosusi sa giingong leakage sa sanitary landfill dinha sa barangay Pagalungan.

Kini human nagtigom ang konseho sa syudad kagahapong adlawa aron pagtuki sa gitaho ni konsehal Nadya Emano-Elipe nga kahingawa sa mga opisyal ug molopyo sa barangay San Simon sa ilang nakitang drainage gikan sa gitukod nga Sanitary Landfill paingon sa Iponan River.

Sa tigom kagahapon nga gidumala ni konsehal Malou Gaane isip chairman sa komite sa panglawas, gibarugan ni kapitan Rodolfo Nacario ang ilang giluwatang adunay leakage gikan sa landfill nga matod pa maoy hinungdan sa pagkaylap sa sakit sa panit ngadto sa pipila ka mga nanimuyo duol sa Iponan River. Gani, matod niya, lakip ang mga isda nangamatay usab hinungdan nga nakuhaan sa kapanginabuhian ang mga molopyo sa iyang barangay.

Hinuon, si Oliver Egypto, hepe sa Task Force Solid Waste Management ug Elvisa Mabelin, hepe sa Solidwaste Management Division sa buhatan sa City Local Environment and Natural Recources (CLENRO), mipasabot nga walay nahitabong leakage gikan sa leachate pond sa bag-ong landfill paingon sa Iponan River.

Ilang gibutyag nga adunay gitukod nga storm drainage sa maong landfill nga maoy nakita sa mga opisyal sa San Simon nga kanal paingon sa Iponan River. Apan ilang gitin-aw nga wala gayuy nahitabong pag-awas sa tubig gikan sa leachate pond paingon sa maong storm drainage.

Timaan niini, gibutyag sa taga-Clenro, ang resulta sa bag-ong gihimong water quality testing sa Iponan River nga anaa lang sa normal gawas sa nakitang fecal coliform nga sobra kaayo kataas. Apan, ang maong fecal coliform wala nakuha gumikan sa operasyon sa landfill didto sa Pagalungan kun dili gikan sa hugaw sa mga kabalayan.

Dugang niini, si City Health Officer Dr. Fe Bongcas namahayag usab nga walay nalistang kaso sa skin diseases gikan sa San Simon ngadto sa ilang buhatan ingon man sa JR Borja General Hospital.

Matod niya nga gikinahanglang mokonsulta gayud ang mga apektado dinha sa mga Health Centers o’ sa City Hospital aron masuta ang hinungdan sa pagtakboy sa sakit. Kun aduna may nasinating skin diseases posible kining air borne o’ water borne.

Nauyonan sa konseho ang pagmugna sa maong Task Force aron matino gayud ang kamatuoran sa taho ug mahatagan sa kalinaw ang katawhan nga nabalakang maapektohan niini.

Ang maong Task Force gilangkoban sa representante sa Environmental Management Bureau (EMB) sa buhatan sa DENR isip vice chairman ug gisakopan sa City Health Officer, representante sa DOST, Xavier University, Solidwaste Management Division sa Clenro, mga kapitan sa barangay San Simon, Pagalungan, Iponan, Pagatpat, Canitoan ug Baikingon, Sanitary Engineer sa DoH, representante sa Liceo de Cagayan Safer River Foundation ug Archdiocese of Cagayan de Oro.