Pascual padayong nagtuon sa sugyot balaodnon nga magdili sa inusarang pagbyahe sa mga menor de edad

Padayong gitun-an sa komite sa youth and sports development ni konsehal Jay Pascual ang gisugyot nga balaodnon nga magdili sa inusarang pagbyahe sa mga menor de edad pasulod ug pagawas sa dakbayan sa Cagayan de Oro.

Tumong sa maong balaodnon nga maprotektahan ang kabataan ilabina sa mga mapahimuslanong mga tawo ug mapakgang ang mga insidente sa child trafficking.

Ubos sa maong sugyot, gidid-an ang pagbyahe sa mga menor de edad kun walay kaubang ginikanan o’ legal guardian nga dili makapresentar sa insaktong mga dokumento nga magpamatuod sa relasyon niini ngadto sa bata.

Ang sugyot balaodnon nagpahamtang og silot nga dili mominus sa unom ka bulan nga pagkapriso ngadto sa usa ka tuig o’ multa nga dili mominus sa P3 mil ug dili molabaw sa P5 mil o’ multa ug silot depende sa hukom sa korte.

Ang komite ni Pascual gitakda usab nga mopahigayon og public hearing alang sa maong katuyoan.

Ang maong sugyot ordinansa giduso ug gipangamahanan ni konsehal Edna Dahino, chairman sa komite sa women and family relations.