Acenas nangusog masolosyonan problema sa pagbaha sa syudad

Si konsehal Dometilo Acenas padayong naninguha nga mapatuman sa hingpit ang mga pamaagi nga masolosyonan ang pagbaha dinhi sa dakbayan sa Cagayan de Oro.

Sa tigom sa komite sa subdivision sa milabayng semana, si Acenas hugot nga mihangyo sa mga subdivision developer ug mga kontraktor nga madungan sa pag-develop sa usa ka proyekto ang pagtukod og detention pond.

Ang maong detention pond maoy makatabang nga maminusan o’ mapakgang ang pagbaha ilabina dinhi sa sentro nga bahin sa syudad, pasabot ni Acenas.

Atol sa tigom, ang representante sa buhatan sa City Engineer’s mibutyag nga subay sa balaod ang detention pond mokabat kini sa dos porsyento sa kinatibuk-ang area sa usa ka subdivision project.

Unta ato kining masunod ang pag-instalar og detention pond dili lang alang sa pagsunod sa balaod kun dili dala na ang tinguha pagproteher sa kinaiyahan, pangaliyupo ni konsehal Acenas.

Ang tigom sa komite sa subdivision gitambongan ni konsehal Rueben Daba uban sa mga representante sa lain laing departamento sa City Hall.