Calizo nangusog mapatuman drug test sa mga opisyal, kawani sa City Hall

Kinahanglang mapatuman na sa hingpit ang mandatory drug testing sa tanang opisyal ug kawani sa City Hall.

Mao kini ang panawagan ni konsehal Romeo Calizo, chairman sa Cagayan de Oro Anti-Drug Abuse Council (CADAC) ug komite sa police, fire and public safety sa konseho, atol sa tigom sa CADAC sa milabayng semana.

Matod niya nga angayang mapalabang na ang balaodnon nga maggahin sa pundong gikinahanglan alang sa maong drug testing ug mahimo na kini sa dili pa mahuman ang tuig 2017 tungod kay kabahin kini sa mga rekisitos nga giluwatan sa buhatan sa Presidente, Civil Service Commission ug sa kadagkoan sa Philippine National Police.

Sa ilang bahin, si OIC City Prosecutor Charisse Bitoon ug City DILG Director Engr. Jane Docallos mibutyag nga sa ilang buhatan medical kit lang ang ilang gipalit ug ang PDEA na ang naghatag sa ilang libreng serbisyo sa laboratory ug pagproseso niini.

Si Calizo midugang nga ang PDEA boluntaryong mipadayag sa ilang serbisyo sa pagpahigayon sa drug testing apan ang medical kit alang sa kapin sa 6 mil ka mga opisyal ug kawani sa City Hall gikinahanglan pang paliton.

Niini, si konsehal Edna Dahino, chairman sa komite sa panalapi, mipasalig sa iyang suporta sa pagpalabang sa ordinansa nga maggahin sa gikinahanglang kantidad pagpalit sa maong medical kit nga gibanabanang mokabat lang sa P350 mil.