2 music professors gipasidunggan

GIPASIDUNGGAN sa Konseho sa Syudad, sa sesyon niadtong Miyerkules nga gidumala ni Bise Mayor Bebot Rodriguez, ang duha ka professor sa Liceo de Cagayan Conservatory of Music, Theater and Dance.

Sa milabayng sesyon, gitunol sa Konseho ang Resolusyon No. 14728-2023 ug Resolusyon No. 14729-2023 nga nagpasidungog nila ni Professor Horst Hans Bäcker ug Professor Cipriano de Guzman Jr. sa kalampusan nga ilang naangkon.

Si Konsehal Suzette Matagjas-Daba, usa sa nangamahan sa nahisgotang mga resolusyon, mibutyag nga nasakmit ni Bäcker ang ikaduhang pwesto sa 2022 Worldvision Composers Contest.

Giingon nga si Bäcker ang unang nakakuha sa maong kalampusan sukod niadtong tuig 2016. Bäcker mao ang co-founder ug conductor sa Cagayan de Oro Symphony Orchestra.

Gipili ni Bäcker nga magpuyo sa syudad aron iyang mapaabot ang iyang kaalam sa mga Kagay-anong kabataan nga mahiligon sa musika.

Samtang si de Guzman, ang unang Pilipino nga nakapasundayag sa Italian opera debut niadtong Septembre 23–24, 2023 sa II Barbiere di Siviglia (The Barber of Seville) didto sa Savoi, Campobasso, Italy.

Dako ang panghinaut ni Konsehal Suzette nga makaaghat ang naangkong kalampusan sa duha ka magtutudlo sa mga kabataan nga mapalambo usab ang ilang mga talento ug hilig sa pagkanta.