2 FMR projects mapatuman

DUHA ka mga proyekto sa imprastraktura ang gipaabot nga mapatuman dinha sa Barangay Cugman ug Tablon. Kini human giuyonan sa Konseho sa Syudad, sa sesyon niadtong Lunes nga gidumala ni Bise Mayor Bebot Rodriguez, ang Memorandum of Understanding (MOU) tali sa kagamhanan sa dakbayan ug 2nd District Engineering Office sa Department of Public Works and Highways (DPWH-10).

Ang MOU naglangkob sa panagtambayayong dinha sa pagpatuman sa mga proyekto pagsemento sa Barangay Cugman Farm-to-Market Road (FMR) Phase II balor P16.5 milyones ug pagsemento sa Sitio Palalan, Barangay Tablon FMR balor P16.5 milyones.

Subay sa probisyon sa Akta Republika 8435 kon Agriculture and Fisheries Modernization Act (AFMA), ang FMR projects ipatuman pinaagi sa counter-parting scheme nga dili mominus sa 10 porsyento sa bahin sa lokal nga kagamhanan.

Niini, ang konseho migahin og P3 milyones isip paatbang-pundo sa maong duha ka proyekto sa tag-P1.5 milyones matag usa. Ang ordinansa nga gipalabang sa konseho alang sa maong katuyuan gihangyo ni Mayor Klarex Uy nga maaksyonan sa labing daling panahon.