2/f awardees sa Cogon Mkt mahimo nang maglukat og single biz permit

Hayan mahatagan sa dugang kaarangan ang kapanginabuhian sa mga mamaligyaay sa ikaduhang andana sa merkado sa Cogon.

Kini human giuyonan sa konseho sa syudad sa sesyon niadtong Lunes nga gidumala ni Bise Mayor Bebot Rodriguez ang ordinansa nga naghatag og panugot sa pag-isyu og usa lang ka business permit alang sa kasamtangang manag-abay nga latag nga gi-abangan sa usa lang ka pamilya.

Sa ordinansa, gitugutan nga usa lang ka business permit ang lukaton sa manag-abay nga latag nga na-award sa lain laing indibidwal apan kauban sa pamilya subay sa imbentaryo nga gisumete sa City Economic Enterprises and Business Development Administration (CEEBDA).

Hinuon, kini ma-avail sa mga stall holders sa kondisyon nga nabayaran ang tanang business permit fee ug uban pang balayronon sa tuig 2022 sa mga apektadong latag ug ang space rental sa mga apektadong rentable spaces nabayaran usab in full.

Dugang pa, gikinahanglan nga ang aplikante sa single business permit adunay balidong business permit sa tuig 2022, makasumete sa notaryadong sulat nga magpadayag sa intention pag-okupar sa kasikbit nga latag ug ang mga awardee o’ nag-abang sa kasikbit nga latag mohimo og waiver of award pabor sa aplikante sa single business permit.

Niini, ang mga apektadong awardees ma-exempt na sa palisiya nga “One Person, One Stall” subay sa Section 163 sa Ordinance No. 4373-94 kon Codified Ordinance of Cagayan de Oro City.

Malaumon si Konsehal Ian Mark Nacaya, chairman sa komite sa economic enterprises, nga makatabang sa kapanginabuhian sa mga mamaligyaay sa second floor sa merkado sa Cogon ang maong lakang ilabina sa gihangyong maminusan ang ilang galastohon sa paglukat sa business permits.