₱1.565 M nga programa, proyekto sa Brgy F.S Catanico mapatuman

KAPIN sa ₱1.565 milyones ang gigahin alang sa gihan-ay nga programa ug proyekto sa Barangay F.S Catanico.

Kini human ang konseho sa syudad, atol sa ilang sesyon niadtong Lunes nga gidumala Bise Mayor Bebot Rodriguez, misagop sa resolusyon nga nag-uli sa ordinansa sa barangay diin nasukip ang ilang 2024 annual budget nga adunay gibanabanang galastohon balor ₱5,177,423.

Lakip sa gipundohan mao ang 20 porsyentong (20%) development fund balor ₱789,043.00; samtang ₱517,742.00 usab ang gigahin alang sa pagpatuman sa mga programa sa Sangguniang Kabataan (SK); ₱181,210.00 alang sa Barangay Disaster Risk Reduction Management fund; ₱200,000 alang sa pagrehabilitar sa ilang water supply system; ₱150,000 alang sa pag-instalar sa street lights ug uban pang mga programa nga gilantaw’ng maghatag ug dugang kaarangan sa ilang serbisyo ngadto sa katawhan.

Ang 2024 annual budget sa Barangay F.S Catanico miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang ipatuman sa labing dali nga panahon.

Ang resolusyon nga gipalabang sa konseho alang sa maong katuyoan gipaluyohan sa Komite sa Barangay Affairs ni Konsehal Yan Lam Lim ug sa Komite sa Pamalaod ni Konsehal Edgar Cabanlas.