MAHIMO nang ipatuman sa Barangay 1 ang ilang mga programa ug proyekto nga ilang gipundohan karong tuiga.
Kini human ang konseho sa syudad atol sa ilang sesyon niadtong lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2024 Annual Budget nga adunay gibanabanang kinitaan ug galastuhon balor P4,607,204.00.
Lakip sa gipundohan mao ang 20 porsyentong (20%) Development Fund balor P442,455.00; samtang P460,720.00 usab ang gigahin alang sa pagpatuman sa mga programa sa Sangguniang Kabataan; P161,252.00 alang sa Risk Reduction Management Fund; P10 mil ang gigahin alang sa programa sa senior citizens ug uban pang mga programa nga gilantawng maghatag ug dugang kaarangan sa ilang serbisyo ngadto sa katawhan.
Ang 2024 annual budget sa Barangay 1 miagi sa makuting pagtuon sa mga komite sa konseho ug nasuta nga nahiyuon sa balaod ug mahimong ipatuman sa labing dali nga panahon.
Ang resolusyon nga gipalabang sa konseho alang sa nasangpit nga katuyuan gipaluyohan sa Komite sa Barangay Affairs ni Konsehal Yan Lam Lim ug sa Komite sa Pamalaod ug Reglamento ni Konsehal Edgar Cabanlas.
HISGOTAN sa Komite sa Turismo ni Konsehal Jay Roa Pascual diha sa hawanan sa konseho sa may alas 9:00 sa buntag karong Nobyembre 28 ang gisugyot nga ordinansa ni Konsehal Girlie Balaba nga mapreserbar ang pottery making diha sa Barangay Bulua.
Sa iyang special report, si Konsehal Balaba nagkanayon nga ang maong lokal nga produkto angayan tabangan sa syudad aron ma-sustain ang maong industriya pinaagi sa paghatag og kahibalo sa mga magkukulon aron makahimong competitive ang ilang mga produkto.
Niini, gidapit atol sa tigom sila si City Administrator Roy Hilario P. Raagas, City Legal Officer Kenneth O. Tamala, Acting Department Manager, Mark Kenneth Jalapadan sa City Tourism and Cultural Affairs Office, OIC Jesus Christopher Salon sa Historical Commission City Museum ug Bulua Punong Barangay Al Legaspi, Jr. alang sa ilang rekomendasyon.
Tukion usab sa Komite atol sa maong tigom ang sugyot pagdeklarar sa matag katapusan sa semana sa Marso isip Sonampat Festival Week sa dakbayan sa Cagayan de Oro.
Gipaabot usab nga motambong sila si Konsehal Girlie Balaba, Suzette Magtajas-Daba, Imee Moreno, Joey Abbu, Jr., Aga Suan, Yan Lam Lim, Christian Rustico Achas, Edgar Cabanlas ug si Bise Mayor Bebot Rodriguez.
KONSIDERAHON sa Komite Public Order atol sa tigom karong adlawa ang special report ni Konsehal Romeo Calizo alang sa pag-establisar og forensic office dinhi sa syudad.
Mahinumduman nga si Calizo mitaho nga daghan nang dakbayan ug kalungsoran nga adunay kaugalingong buhatan sa forensic apan ang Cagayan de Oro nga maoy sentro sa rehiyon wala niini nga matang sa buhatan nga dako untag ikatabang sa pagsulbad sa mga krimen.
Gipasabot sa konsehal nga ang forensic dako kaayo og ikatabang pagsulbad sa mga krimen hinungdan nga iyang gilantaw nga mapundohan kini sa syudad.
Gidapit sa Komite pagtambong sa tigom sila City Administrator Atty. Roy Hilario Raagas , City Legal Officer Atty. Kenneth Tamala, Ms. Roxanne Mae Ravidas sa buhatan sa City Budget, Ms. Chedilyn Aissa Dulguime sa City Planning and Development Office, City Police Director P/Col. Salvador Radam, DILG-City Director Edward Bhagwani, Director sa Benjamin Gaspi sa Philippine Drug Enforcement Agency, Dir. Patricio Bernalez Jr sa National Bureau of Investigation (NBI) ug Dr. Gerry Cano, Dean sa School of Criminology and Crime Justice –Cagayan de Oro College.