GISUGYOT ni Konsehal Ian Mark Nacaya nga unta makonsiderar ang pagpatuman sa conduit system sa mga cable dinhi sa syudad.
Kini ang reaksyon sa Konsehal sa special report ni Konsehal Roger Abaday sa sesyon niadtong Lunes nga gidumala ni Bise Mayor Bebot Rodriguez kalabot sa accomplishment report sa Task Force Klarex nga Serbisyo sa Kable sa tuig 2024.
Sumala ni Nacaya nga nalipay siya sa kalamposan sa maong Task Force nga mahipos ang mga spaghetti wires sa kadalanan, apan siya misugyot nga unta makonsiderar ang gitawag nga conduit system, usa kini ka sistema diin wala nay makitang mga kableng magbitaybitay sa mga poste tungod kay anaa naman kini nagsubay sa ilawom sa yuta.
Hinoon, iyang giklaro nga usa kini ka hagit kon kinsa ang mo-invest niini, mahimong ang kagamhanan sa syudad o pribadong entity nga adunay papel diha sa pagsupply sa kuryente, cable ug public utility services aron didto na moagi sa dakong pipes ilawom sa yuta ang mga kable nga nagdugtong gikan sa lain laing power ug telecommunication providers.
Gipasabot nga kon kini mapatuman dinhi, gawas lang sa Metro Manila, ang dakbayan ang unang makabaton niini.
Let’s do this in Cagayan de Oro, pamahayag ni Konsehal Nacaya. (JRGalano/SP)
HINIUSANG giuyonan sa Konseho sa Syudad atol sa sesyon niadtong Lunes nga gidumala ni Bise Mayor Bebot Rodriguez ang resolusyon nga nagpasidungog sa Task Force Klarex nga Serbisyo sa Kable tungod sa mga kalamposan niini.
Gikabutyag nga ang maong task force nga gilangkuban sa nagkadaiyang ahensya sa gobyerno ug mga pribadong sector gitahasan sa paghinlo ug pagtangtang sa mga spaghetti wires nga nagbitay sa mga poste sa kadalanan nga nakahatag kahugaw, purwisyo ug dilikado sa mga motorista.
Gitinguha sa maong task force ang hingpit nga pagpanangtang sa mga spaghetti wires dinhi sa syudad.
Ang resolusyon nga gisagop sa konseho gipangamahanan ni Konsehal Roger Abaday, chairman sa komite sa environment. (MLRapanot/SP)
KUSGANONG gihangyo ni Konsehal Datu Roberto Cabaring, chairman sa komite sa cultural communities, ang Konseho sa Syudad nga mahatagan og pagtagad ang katungod sa mga Indigenous People (IP) sa pagpanag-iya sa usa ka parsela nga luna diha sa Sitio Village, Barangay Dansolihon.
Sa iyang special report atol sa sesyon niadtong Lunes nga gidumala ni Bise Mayor Bebot Rodriguez, si Konsehal Cabaring mibutyag nga na-alarma ug nabalaka ang mga lumad human nadawat ang notice to vacate ug gipasidan-an sa pagpangandam sa usa ka demolisyon nga ipahigayon sulod sa tulo ka adlaw.
Gipasabot ni Cabaring nga sa dugay na nga panahon, gikan pa sa kasaysayan sa ilang mga katigulangan, diha na sila natawo sa maong luna.
Tungod niini, si Konsehal Cabaring hugot nga mihangyo sa Konseho sa usa ka panagtagbo uban sa buhatan sa Department of Natural Resources (DENR), Department of Agrarian Reform (DAR) ug National Commission on Indigenous Peoples (NCIP) aron mapadayag sa mga lumad ang ilang katungod sa pagpanag-iya ug mahatagan og katin-awan ang gitawag nga native title nga gikan pa sa kasaysayan sa ilang mga katigulangan.
Ang maong taho giduso ni Bise Mayor Bebot Rodriguez ngadto sa komite sa cultural communities ubos ni Konsehal Roberto Cabaring ug sa komite sa pamalaod ug reglamento ni Konsehal Edgar Cabanlas alang sa dugang pagtuon ug tukmang aksyon. (RNQuiblat/SP)