MAYORIYANG giuyonan sa konseho sa syudad atol sa sesyon niadtong lunes nga gidumala ni Bise Mayor Bebot Rodriguez ang resolusyon nga nagpadayag sa ilang pagsupak sa lakang sa Local Water Utilities Administration (LWUA) nga naglugway sa pagdumala sa Interim General Manager Fermin Jarales ug mga Interim Board of Directors sa Cagayan de Oro Water District (COWD).
Gikabutyag nga dili angayan magpadayon sa pagdumala ang maong Interim General Manager ug Interim Board of Directors tungod kay walay nakitang kausaban o solusyon sa problema sa panubig sa syudad sa ilang gihatag nga unom ka bulan nga pagdumala.
Hinuon nakamugna kini ug kasamok sa maong buhatan nga nakaapekto sa operasyon ingon man sa mga kawani sa COWD nga nakasinati sa pagpanghulga.
Gilaumang respetuhon sa LWUA ang katungod sa Local Government Unit nga maoy mobalik sa pagdumala subay sa lagda sa balaod tungod kay wala nay nakitang basehan nga magpabilin pa nga magdumala ang interim manager.
Ang resolusyon nga gisagop sa konseho gipangamahanan ni Konsehal Roger Abaday, chairman sa Komite sa Games and Amusement ug Komite sa Pamalaod ni Konsehal Edgar Cabanlas.
DUGANG kalamboan sa natad sa edukasyon ang gilantaw matagamtaman sa kabataan sa dakbayan.Kini human nadawat sa konseho ang taho gikan ni District Engineer Ana Lee Manzano sa 1st District Engineering Office sa rehiyonal nga buhatan sa Department of Public Works and Highways (DPWH) nga padayon karong gitrabaho ang duha ka tunghaan dinhi sa syudad.
Lakip sa maong mga proyekto nga ubos sa pundo sa DPWH mao ang pagtukod sa 2-storey building nga adunay walo ka lawak saringan diha sa Upper Carmen Elementary School ug 4-storey building nga adunay walo ka lawak saringan diha sa Kauswagan Central School.
Gikalipay ni Konsehal Suzette Magtajas-Daba, chairman sa Komite sa Edukasyon, nga nagpadayon ang maong ahensya sa hugot nga kolaborasyon ug koordinasyon sa kagamhanang lokal sa pagpatuman sa mga proyekto aron mahatag ngadto sa kabataan ang kahamugaway sa ilang pagtungha.
Dugtong sa konsehal nga wala nay rason nga dili makahuman sa elementarya ang kabataan sa dakbayan kay anaa na gyud sa ilang tugkaran ang mga tunghaan.
GIPAABOT nga konsiderahon sa Komite sa Barangay Affairs ubos ni Konsehal Yan Lam Lim ang ordinansa nga gipalabang sa Konseho sa Barangay Mambuaya kabahin sa environmental sanitation plan sa barangay.
Kini nagtumong sa pagsulbad sa mga isyu sama sa waste management, proper sanitation, pagkontrolar sa polusyon ug kahimsog sa panglawas sa mga residente sa tuyo nga mapalambo ang kinatibuk-ang kaayohan diha sa komunidad.
Sa maong ordinansa gitutukan sa barangay nga ilang mahatag ang tukmang impormasyon aron mapalambo ang kalimpyo, kahimsog sa panglawas ug malungtaron og luwas nga palibot alang sa mga residente pinaagi sa pagpatuman sa usa ka komprehensibong plano alang sa sanitasyon sa kinaiyahan.
Lakip sa nakalatid sa ordinansa ang pagmulta ug maghatag og community service sa mga makalapas sa barangay ordinance.