KONSIDERAHON sa Komite sa Barangay Affairs ubos ni Konsehal Yan Lam Lim ang Ordinance No.06-2024 nga gipalabang sa Barangay Macabalan.
Kini maghatag og cash incentives ug plaque of appreciation alang niadtong mga estudyante nga mogradwar sa kolehiyo nga adunay latin honors, topnotchers sa bar o board examination ingon man sa mga atleta nga makasakmit og medalya sa prestihiyosong national ug international sports competition .
Sumala pa nga kini maghatag og kadasig sa mga estudyante sa ilang barangay nga maningkamot aron nga maabot ang taas nga academic ug athletic performance ug nga mapasidunggan sa barangay ang ilang kalamposan human kini makatapos sa kolehiyo nga adunay latin honors o nahimong topnotchers sa mga board ug bar examinations.
HAYAN mahatagan og kahamugaway og seguridad ang kabataan sa pipila ka barangay ning dakbayan.
Kini human gipundohan sa konseho sa syudad ubos ni Bise Mayor Bebot Rodriguez ang proyekto nga mobalor sa P19 milyones kapin alang sa walo ka tunghaan sa syudad.
Kini nga mga proyekto nasukip sa 2024 Supplemental Annual Investment Plan (SAIP) 3 ubos sa General Fund nga giaprobahan sa Konseho sa syudad niadtong Lunes.
Kini gilangkoban sa pagtukod sa stage, perimeter fence, gate ug signage sa San Simon Elementary School nga balor P5milyones; pagtibawas sa San Simon National High School Covered Court with bleachers mobalor og P2,022,105.00; pagrehabilitar og pag-ayo sa multipurpose stage sa Taguanao Elementary School balor P3,318,761.00 ug pagtukod og drainage system sa Barangay National High School nga balor P2,680,659.00.
Samtang gipundohan usab ang pagsemento sa dalan nga adunay drainage system sa Puerto National High School balor P1,173,943.00; pagtukod og drainage system ug pagtul-id sa Macabalan National High School balor P2,881,172.00; pagtaod sa rehas sa building sa Bulua Central School balor P332,700.00 ug ang pagtukod sa pergola, gate, guard house ug koral diha sa Carmen National High School nga balor P2,223,685.00.
Niini, dako ang pasalamat ni Konsehal Suzette Magtajas-Daba sa administrasyon ni Mayor Klarex Uy sa padayong paglantaw alang sa dugang kalamboan sa mga kabataan sa dakbayan.
Siya midugang nga dako kaayo ang ikatabang ang maong mga proyekto sa seguridad ngadto sa tanang kabataan sa dapit.
Updated: Dec 9, 2024
MAHIMO nang ipatuman sa SK Barangay Balulang ang mga programa ug proyekto nga gipundohan para karong tuiga, human giaprobahan sa konseho sa syudad atol sa sesyon niadtong Lunes ang ilang 2024 annual budget nga nagkantidad og ₱3,637,901.
Gitagaan og prayoridad sa SK ang mga proyekto alang sa youth development ug empowerment, diin ang ₱3,000,000.00 gigahin alang sa mga programa nga mosuporta sa kalambuan sa kabatan-onan sa aspeto sa panglawas, edukasyon, social inclusion ug equity, kalinaw ug seguridad, maayong pamalaod, aktibong partisipasyon sa komunidad, ug pagpanalipod sa kalikupan.
Ang nahabiling ₱637,901.00 gigahin para sa uban pang suplay ug materyales nga kinahanglanon.
Ang maong budget gikuha gikan sa 10% sa kinatibuk-ang pundo sa barangay, subay sa mandato sa Republic Act 10742 o ang Sangguniang Kabataan Reform Act of 2015, nga nagtumong sa pagpalig-on sa sector sa kabatan-onan.
Gipaluyohan ang maong resolusyon ni Konsehal Kenneth John Sacala, chairperson sa Komite sa Sports ug Youth Development, ug ni Konsehal Edgar Cabanlas, chairperson sa Komite sa Pamalaod ug Reglamento.