Updated: Jan 24
SI Konsehal Suzette Magtajas-Daba, chairman sa komite sa edukasyon, malipayong mipahibalo sa katawhan sa dakbayan nga ang 2025 College City Scholarship Program online application mag-abri na sa umaabot Pebrero 03.
Matod ni Daba nga ang kagamhanan migahin og igong pundo alang sa mamahimong iskolar sa dakbayan sa tuig 2025-2026.
Dako kini nga kahigayonan sa tanang umaabot first year college nga mga tinun-an sa syudad nga kun mapili silang benepisaryo sa maong programa makaangkon gyud sa ilang gidamgong kurso nga maghatag kanila og hayag nga kaugmaon, dugang sa konsehal.
Niini si Konsehal Daba kusganong nanawagan sa mga ginikanan ug giawhag ang mga interesado ug kwalipikadong tinun-an sa pagpahimulos niining talagsaong oportunidad nga gihatag sa syudad.
Nagpahinumdom usab ang konsehal nga kinahanglan kumpletohon gyud ang ilang mga rekisitos aron makakuha og eksaminasyon.
Alang sa dugang detalye ug impormasyon, mahimong bisitahan ang FB page CDO City Scholarships Office o motawag sa numero 0929-819-0819.
Updated: Jan 24
HINAOT ma-monitor ang mga establisamento sa ilang dayag nga pagpaskil sa mga pahibalo arun masiguro nga ang mga PWDs ug hamtong masayod sa ilang mga prebilihiyo ug katungod.
Kini ang unod sa special report in Konsehal Roger Abaday, atol sa ika-107 nga regular sa sesyon sa Konseho nga gidumala ni Bise Mayor Bebot Rodriguez, kinsa miawhag pagbutang og ngipon sa RA 10754 nga nagmando sa paghatag og 20% discount ug 12% VAT exemption sa tanang PWDs ug senior citizens.
Sa maong higayon , gipasabot ni Konsehal Abaday, vice chair sa komite sa senior citizens, ang kamahinungdanon sa maong balaodnon nga naninguhang makunhuran ang ilang galastohon sa mga batakang panginahanglanon sama sa pagkaon, transportasyon ug tambal.
Matod ni Abaday daghan nang ahensiya sa gobyerno ang mihimo og lakang arun masuportahan ug paluyohan ang maong balaodnon.
Gani ang bag-ohay nga gipagawas nga Administrative Order 2024-0017 sa Department of Health misitar nga igo lamang mupresentar og ID o’ reseta sa doctor ang senior citizen arun kini maka-avail sa discount og dili na kinahanglan ang naandang purchase booklet, sumpay ni Abaday.
Nunot niini, giduso ni Bise Mayor Rodriguez ang maong taho ngadto sa komite sa senior citizens ni Konsehal Yevona Yacine Emano ug sa komite sa social services ni Konsehal Joyleen Mercedes Balaba alang sa tukmang rekomendasyon ug aksyon.
Updated: Jan 24
ATOL sa ika-107 nga regular sesyon nga gipangulohan ni Bise Mayor Bebot Rodriguez, mayoriyang giuyonan sa Konseho sa Dakbayan ang resolusyon alang sa 2024 annual budget sa Sangguniang Kabataan (SK) sa Barangay Balubal ug 2025 annual budget sa SK sa Barangay Bugo, Kauswagan, ug Macabalan.
Ang budget sa Barangay Balubal adunay gibanabanang kinitaan ug galastuhon nga nagkantidad ₱962,938.00.
Matod ni Konsehal Kenneth John Sacala, bisan og dili na ma-implementar ang mga proyekto alang sa 2024, mahimong magamit pa ang budget alang sa personal services sa mga miyembro sa SK ug Maintenance and Other Operating Expenses (MOOE).
Alang sa SK Bugo, ang annual budget naglangkob sa kinitaan ug galastohon balor ₱4,360,704.00, samtang ang SK Kauswagan adunay ₱6,250,645.00 ug ang SK Macabalan adunay ₱2,619,385.00.
Gipalabi sa mga barangay ang mga programa nga nagpalambo sa kabatan-onan pinaagi sa edukasyon, kalinaw ug seguridad, social inclusion, maayong pang-gobyerno, partisipasyon sa komunidad, environment, agrikultura, global mobility, panglawas, ug economic empowerment.
Gipaluyohan ang maong resolusyon ni Konsehal Sacala, chairperson sa komite sa sports ug youth development.