Updated: Jan 24
HAYAN matunol na gayod ang P80,000 nga proyektong panginabuhian sa 24 ka mga kapunongan sa fisherfolk ning syudad.
Kini human gikumpirma ni City Treasurer Jasmin T. Maagad, pinaagi sa representante sa City Budget Office, atol sa tigom sa komitiba sa Fisheries and Aquatic Resources ni Konsehal Christian Rustico Achas, nga andam na ang tseke alang sa maong katuyoan.
“I had a chance to follow up our City Treasurer, Maam Jingjing, this morning. She already instructed the program implementer (which is the Agricultural Productivity Operations Office (APOO)) to coordinate with them because the cheque has already been issued. So pwede na siya for release,” matod sa maong representante.
Gikalipay kani pag-ayo ni Konsehal Achas tungod kay nag-sige na og follow up ang mga mangingisda diha kaniya.
Gani, nakahikay na sila sa mga rekisitos ug papeles nga gikinahanglan sa maong program sa Bureau of Fisheries and Aquatic Resources (BFAR).
Sa iyang bahin, mipasabot si City Agriculturist, Mr. Paterno L Gonzales, Jr., nga nakasugod na ang iyang buhaton sa pagproseso sa maong budget request niadto pang Agosto miaging tuig apan miagi pa kini sa makuting pagtuki sa City Accounting.
Nabalik usab sa ilang buhatan ang mga naunang napasang dokumento kay, matud ni Gonzales, naay usa ka asosasyon sa fisherfolk nga wala nakaduso sa ilang papeles hinungdan sa pagkalangan sa pag-aprobar sa maong budget.
Ang maong asosasyon mipirma na og waiver nga dili nalang sila mo-avail sa maong proyekto, dugtong sa city agriculturist.
Sa pangutana ni Konsehal Achas sa buhatan sa APPO kon ipa-comply pa ba sa mga requirements ang mga mangingisda, si Gonzales miingon, “If (the budget) is already subject for release, i-release na siguro na.”
Nunot niini, giaghat ni Konsehal Achas ang APPO nga ma-follow up na ang budget sa labing daling panahon.
Updated: Jan 24
MAHIMO nang ipatuman sa Barangay 4 ang ilang mga programa ug proyekto nga gipundohan karong tuiga.
Kini human ang Konseho sa milabayng sesyon nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2025 annual budget nga adunay gibanabanang kinitaan ug galastuhon balor P3,675,245.00.
Lakip sa gipundohan mao ang 20 porsyentong (20%) development fund balor P403,949.00; samtang P367,525.00 usab ang gigahin alang sa pagpatuman sa mga programa sa Sangguniang Kabataan; P200,000.00 alang sa instalasyon sa ilang mga street lights; P203,949.00 ang gigahin alang sa declogging sa ilang canals samtang P 10 mil sa programa sa mga senior citizens ug uban pang mga programa nga gilantawng maghatag ug dugang kaarangan sa ilang serbisyo ngadto sa katawhan.
Ang 2025 annual budget sa Barangay 4 miaagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang ipatuman sa labing dali nga panahon.
Ang resolusyon nga gipalabang sa Konseho alang sa maong katuyuan gipaluyohan sa komite sa barangay affairs ni Konsehal Yan Lam Lim ug komite sa pamalaod ug reglamento ni Konsehal Edgar Cabanlas.
Updated: Jan 24
GISUGYOT ni Konsehal Bernie Esparcia, chairman sa komite sa climate change adaptation & mitigation and disaster risk reduction, nga unta masukip sa hospital billing sa mga indigent patients ang professional fee sa mga doctors.
Kini ang unod sa special report sa konsehal sa milabayng sesyon sa Konseho nga gidumala ni Bise Mayor Bebot Rodriguez.
Sumala ni Esparcia nga mahimong makapangayo og tabang sa lain laing ahensya sa gobyerno sama sa City Social Welfare and Development (CSWD), Department of Social Welfare and Development (DSWD), mga kongresista ug uban pa apan ang problema dili gihapon dali makagawas ang mga indigent patients tungod kay galisod kinig bayad sa PF tungod kay wala man kini malakip sa final hospital billing.
Gipasabot ni Esparcia nga bisan pag matagaan sa tabang ug diskwento ang mga pasyente galisod pa gihapon kini sa pagawas tungod kay dili man kini makagahom pagbayad sa PF.
Subay niini, nanghinaot si Esparcia nga makonsiderar ang maong sugyot aron matabangan ang mga indigent nga mga pasyente.