PINAAGI sa resolusyon nga gipalabang sa konseho sa dakbayan ubos sa pagpangulo ni Bise Mayor Bebot Rodriguez, hingpit nang mapatuman sa Sangguniang Kabataan (SK) sa Barangay Lumbia ug Canitoan ang ilang mga programa ug proyekto alang sa kabatan-onan sa ilang barangay.
Ang maong mga resolusyon nag-aprobar sa SK annual budget alang sa tuig 2025 nga nagkantidad sa ₱4,474,572.00 alang sa Lumbia ug ₱4,322,480.00 alang sa Canitoan.
Ang mga prioridad sa ilang pondo naglakip sa mga inisyatibo nga nagtinguha sa pagpalambo sa kabatan-onan, diin dako nga bahin sa budget ang gitumong alang sa mga proyekto sa panglawas, edukasyon, pangagamhanan ug pagpakusog sa kapasidad sa SK, kalamboan sa ekonomiya, kalikopan, panginabuhian, maayong panggobyerno ug aktibong pagpanginlabot sa komunidad.
Lakip usab sa maong pondo ang alokasyon alang sa honorarium sa mga SK officials, maintenance and other operating expenses (MOOE), ingon man ang pundo alang sa supply sa opisina, official travels, kontribusyon sa SK Federation, ug uban pang panginahanglanon sa pagpadagan sa ilang buhatan.
Ang maong pondo gikuha gikan sa 10% sa kinatibuk-ang budget sa barangay, subay sa mandato sa Republic Act 10742 o Sangguniang Kabataan Reform Act of 2015.
Ang pag-aprobar sa maong mga budget gipaluyohan sa komite sa sports and youth development nga gipangulohan ni Konsehal Kenneth John Sacala, ug sa komite sa pamalaod ug reglamento nga gipangulohan ni Konsehal Edgar Cabanlas. (SPEscoltos/SP)
GIBUTYAG ni Konsehal Edgar Cabanlas nga ang special report ni Konsehal Datu Roberto Cabaring nagkinahanglan sa legal nga pagtuon aron masiguro nga kini mahiuyon sa balaod ug ordinansa sa dakbayan.
Mahindumduman nga sa miaging sesyon sa Konseho nga gidumala ni Bise Mayor Bebot Rodriguez, si Konsehal Cabaring mitaho kalabot sa demolisyon sa Barangay Dansolihon subay sa desisyon nga gi-isyu sa Branch 41 sa Regional Trial Court sa Civil Case No. 2014-023.
Si Cabaring mihangyo sa Konseho nga magpatawag og miting uban sa Department of Agrarian Reform, Department of Environment and Natural Resources ug National Commission on Indigenous Peoples aron masabtan ang isyu sa Ancestral Domain ug matuki ang legal nga mga komplikasyon sa mando sa demolisyon.
“Let’s clarify this. There is a court decision placing the defendant or multiple defendants in possession of the property. As far as I know, there is no demolition order yet. The sheriff was directed to report on whether the defendants had been placed in possession. If they have not, due to the plaintiff’s objection, only then will a demolition order be sought,” matod ni Cabanlas.
Dugang pa sa Konsehal nga duha ka punto ang unod sa special report ni Cabaring: una, mao ang bahin sa demolisyon ug ang ikaduha, may kalabotan sa katungod sa mga Lumad sa pipila ka yutang kabtangan sa syudad, diin siya nangayo og tabang sa Konseho.
Ang maong report ubos karon sa konsiderasyon sa Komite sa pamalaod ni Konsehal Cabanlas.
Gipasalig ni Cabanlas nga ang komitiba magpahigayon og patas ug lawom nga pagtuon, base sa legal nga pamaagi samtang giatiman ang kaayohan sa katawhan.
Nagtinguha kini nga makab-ot ang hapsay ug patas nga resolusyon sa maong hisgotanan. (JAOclarit/SP)
GITINGUHA ni Konsehal Roger Abaday, chairman sa komite sa environment, ang pagpanday og ordinansa alang sa pagbutang ug poste sa kadalanan nga maoy kutayan sa mga kompanya sa ilang mga spaghetti wires.
Kini ang sugyot ni Konsehal Abaday atol sa sesyon niadtong Lunes nga gidumala ni Bise Mayor Bebot Rodriguez.
Sumala ni Abaday nga tumong sa maong ordinansa nga maplastar og mahan-ay ang pagbutang sa mga spaghetti wires pinaagi sa pagsunod sa mga gabayan nga nalatid sa balaod.
Nagtuo si Abaday nga mahimong limpyo ang kadalanan ug layo sa peligro ug disgrasya ang katawhan ug mga motorista kay dili naman magpataka og kutay sa mga poste ug dili motuman sa lagda sa balaod.
Mahinumduman nga nahimong problema sa syudad ang nagkutay-kutay nga mga wire sa poste hinungdan nga gitukod sa dakbayan ang Task Force Klarex nga serbisyo sa cable nga ang tahas mao ang paglimpyo sa mga nagbitay-bitay nga mga spaghetti wire.
Ang maong sugyot ni Abaday giduso ngadto sa komite sa public utilities ni Konsehal Romeo Calizo alang sa dugang pagtoon ug rekomendasyon. (MLRapanot/SP)