GUSTONG mapagaan ug mapaduol sa katawhan ang pagduso sa reklamo kabahin sa cybercrime diin pwedeng ma-proceso una sa mga police station ayha mo-adto sa Camp Alagar diin nahimutang ang buhatan sa Regional Anti-Crime Unit (RACU).
Kini ang gipaambit ni Konsehal James Judith sa sesyon niadtong Lunes nga gidumala ni Bise Mayor Bebot Rodriguez diin nahimong bisita si P/Lt.Col. Casan Ali, ang Regional Director sa RACU-10.
Sumala ni Judith nga ang paghimo sa affidavit complaint ug consent form lang ang gikinahanglan sa maong kaso aron kini maduso og pwede masugdan sa mga police station ang pag-proceso pero ang pagpadayon sa kaso ug uban pang protocol o gikinahanglan nga maoy gisitar sa balaod didto na sa Camp Alagar diin nahimutang ang rehiyonal nga buhatan sa RACU-10.
Mahinumdoman nga gipadayag ni P/Lt.Col. Ali nga tulo lang ka dapit sa Region-10 ang anaay response team nga maoy mo-imbistigar sa mga reklamo diin gilangkuban sa Camiguin, Lanao del Norte ug Bukidnon.
Nunot niiini, malaumon si Konsehal Judith nga mahatagan sa konsiderasyon ang maong sugyot sa katuyuan nga dili na mahasol ang katawhan ug mapadali ug mapagaan ang pagproceso sa mga reklamo sa katawhan.
SI Konsehal Ian Mark Nacaya, chairman sa komite sa research and planning, nangusog nga makabaton ang dakbayan sa kaugalingon nga anti cybercrime team.
Kini ang reaksyon sa konsehal atol sa sesyon niadtong Lunes nga gidumala ni Bise Mayor Bebot Rodriguez human mi-courtesy call sa konseho ang bag-ong hepe sa Regional Anti-Crime Unit (RACU) nga si P/Lt.Col. Casan Ali.
Si Ali mibutyag nga ang Cagayan de Oro City Police Office (COCPO) sa pagkakaron kon hisgutan ang ekipo alang sa maong katuyuan wala gayud kini kapabilidad hinungdan nga siya misugyot sa pag-establisar og cybercrime team aron mas mapadali ang pagtubag sa mga reklamo kalabot sa cybercrime.
Sumala ni Konsehal Nacaya nga iyang nasayran nga taas kaayo ang lista sa reklamo nga napasaka sa buhatan sa RACU, apan iya kining nasabtan tungod kay dili lang man ang Cagayan de Oro ang ilang ginaatiman kon dili ang tibook rehiyon.
Niini, gisugyot ni Konsehal Nacaya sa posibleng pag-isyu og direktiba sa mga kagamhanan nga adunay kapabilidad nga mo-invest ani nga buluhaton lakip ang listahan sa mga ekipo ug rekisitos aron maoy basihan sa Konseho sa ilang pagkonsiderar sa pagmugna sa maong buhatan.
GILANTAW sa Barangay Lumbia ang dugang pagpalambo sa ilang industriya sa turismo.
Kini human ang Konseho sa Syudad atol sa sesyon niadtong Lunes nga gidumala ni Bise Mayor Bebot Rodriguez misagop sa resolusyon nga nag-uli sa ilang ordinansa nga nagdeklarar sa matag ikaduhang Lunes hangtod sa ikaduhang Sabado sa bulan sa Hunyo kada tuig isip Araw ng Lumbia ug Kasoy Festival.
Buot sa barangay nga ma-institutionalize ang nakahan-ay nga mga kalihokan ug mahatagan og klaro nga direksyon ang mga palisiya alang sa pagpausbaw sa ilang kalihokan sa turismo.
Alayon niinii, gisuportahan ni Konsehal Yan Lam Lim, chairman sa komite sa barangay affairs, tungod kay pinaagi sa Kasoy Festival, dili lamang ma-promote ang kasoy isip usa sa nag-una og naila nga produkto sa maong barangay, kon dili maghatag usab kini og dugang kita sa katawhan sa maong barangay.
Ang maong lakang miagi sa makuting pagtuon sa mga hintungdang buhatan sa City Hall.
Ang resolusyon nga gipalabang sa konseho alang sa maong katuyuan gipaluyohan sa komite sa barangay affairs ni Konsehal Yan Lam Lim ug sa komite sa pamalaod ni Konsehal Edgar Cabanlas.