GITUKI sa komitiba sa panglawas, nutrisyon, ug health insurance sa Konseho ubos ni Konsehal Maria Lourdes S. Gaane sa ilang tigom sa miaging semana ang sugyot ordinansa nga nagmando paglakip sa professional fee sa mga doktor diha sa hospital bill sa mga indigent patient.
Ang maong ordinansa gisugyot nila ni Konsehal Malvern A. Esparcia ug Bise Mayor Bebot Rodriguez.
Atol sa maong tigom, gipadayag ni Konsehal Esparcia nga kasagaran sa mga indigent patient maglisod gayod pagbayad sa professional fee sa doctor tungod kay gilahi man kini sa ilang bayronon sa hospital.
“Kung sa hospital bill, walay problema kay daghan na ta og programa sa gobyerno sama sa Malasakit Center, apan kasagaran kay dili pa sila makagawas tungod sa bayranan sa doktor,” matod ni Esparcia.
Sa ilang bahin, gipasabot nila Atty. Junbert Salido ug Mr. Nickol Namoc, mga representante sa Department of Health, nga dawaton sa mga ospital ang Guarantee Letters (GL) gikan sa ilang ahensiya, apan adunay limitasyon tungod kay ang DOH makahatag lamang og 50% sa aprobadong bayad sa doktor.
Nunot niini, gisugyot ni Konsehal Esparcia nga makakuha og updated list sa mga doktor nga modawat og GL aron mas matabangan ang mga indigent patient.
Sa iyang bahin, si Konsehal Gaane, misugyot sa paghatag og insentibo sa mga doktor aron sila madasig nga modawat sa mga programa sa gobyerno.
Apan si Atty. Maricel Develos, representante sa Bureau of Internal Revenue (BIR), mipasabot nga ang tanang insentibo ug “exemptions” kinahanglan nga mosubay sa Tax Code.
Si Konsehal Esparcia mibutyag sa kamahinungdanon sa maong ordinansa aron masiguro nga ang mga doktor modawat sa GL alang sa mga indigent patient sa walay pagduhaduha.
Giuyonan sa komite nga palawman pa ang ilang pagtuon sa maong sugyot, lakip na ang pagtumbok sa uban pang insentibo nga posibleng ikatanyag sa syudad. (JAOclarit/SP)
MAPASIGARBOHONG gisaysay ni Konsehal Christian Rustico Achas ngadto sa mga sakop sa prensa ang mga lakang nga nahimo sa iyang komitiba sa fisheries and aquatic resources aron maduso ang mga hangyo sa mga mangingisda sa dakbayan.
Matod ni Konsehal Achas nga human sa usa ka tuig nga pakigbisog aron ma-release ang P80,000 nga pundo alang sa pangibuhian sa mga fisherfolk, natuman na sa lokal nga kagamhanan sa dakbayan ang saad niini nga itunol ang maong kantidad sa bulan sa Enero.
Siya midugang nga iya usab gihimo ang masubsob nga pag-follow up sa P1.4 million nga budget alang sa pagrehabilitar sa coral reef sa Barangay Bonbon human kini naapektohan sa giinstalar nga submarine fiber optic cable sa DITO Telecommunity Corporation.
Mahinumduman nga sa miaging tigom sa iyang komite, gipatawag ni Achas ang kadagkoan sa buhatan sa Agricultural Productivity and Operations arun tukion ang estado sa maong budget sa tinguha nga kini mapahimuslan na sa labing daling panahon. (FDCalotes/SP)
PADAYON ang komite sa climate change ni Konsehal Bernie Esparcia pagsuporta sa mga lakang sa Barangay Bugo tumong sa pagsolbad sa problema sa pagbaha.
Kini human gituki sa komite sa milabyang tigom ang especial report sa konsehal mahitungod sa problema sa pagbaha sa barangay Bugo panahon nga mobunok ang kusog nga ulan nga nakahatag og pelegro sa katawhan ug mga kabtangan.
Matod ni Esparcia nga nakauban ug nakasaksi gayod siya sa gipahigayong inspection sa dapit ug iyang nakita nga napuno ang mga kanal sa lapok, ug ang uban ning-awas na sa kanal.
Sa iyang bahin, ang representante sa Bugo Environmental Advocates mibutyag nga lakip sa ilang gitumbok nga mga hinungdan sa daling pagbaha sa ilang barangay ang kabaga sa lapok sa mga kanal, wala matibawas nga mga dalan, illegal quarry ug uban pa nga nagkinahanglan sa igong pagtagad.
Si Esparcia mibutyag nga magpadayon ang iyang komite sa pagsuporta sa mga lakang nga himoon sa barangay alang sa kasulbaran sa problema sa pagbaha sa maong dapit. (JRGalano/SP)