GIKABALAKA ni Konsehal Bernie Esparcia, chairman sa komite sa climate change adaptation & mitigation, ang sunod-sunod nga panghitabo sa disgrasya sa kadalanan dihas Barangay Puerto ug Mastersons Avenue sa uptown nga bahin sa syudad.
Kini ang unod sa special report ni Konsehal Esparcia atol sa sesyon niadtong Lunes nga gidumala ni Bise Mayor Bebot Rodriguez.
Sumala ni Esparcia nga tungod sa sunod-sunod nga panghitabo angayan kining hatagan sa tukmang aksyon ug solusyon alang sa kapasigurohan sa katawhan ug mga motorista nga malikay sa aksidente dihas kadalanan ilabi na panahon sa kagabhion diin sagad mahitabo ang insidente.
Gisugyot ni Konsehal Esparcia nga malingkuran kini sa komitiba ug dapiton ang kadagkuan sa Roads and Traffic Administration, City Engineering Office ug Department of Public Work and Highways (DPWH) aron mahisgutan ang gikinahanglan ug angayan idugang sama sa pag-improbar sa street lighting, road signages, road safety audit, public awareness ug uban pa.
Ang maong taho ni Konsehal Bernie Esparcia giduso ni Bise Mayor Bebot Rodriguez sa komite sa public utilities ni Konsehal Romeo Calizo alang sa tukmang aksyon ug rekomendasyon. (MLRapanot/SP)
SAMTANG suportado ni Konsehal Romeo Calizo, chairman sa komite sa public safety, ang katudloan ni Dr. Lestoni P. Babia isip presidente sa City College of Cagayan de Oro, iyang gikwestyon ang salary grade niini ug nangayo og referensya sa gibasihan niini.
Kini ang reaksyon sa Konsehal sa sesyon niadtong Lunes nga gidumala ni Bise Mayor Bebot Rodriguez sa sugyot resolusyon nga magkompirma sa katudloan ni Dr. Babia isip President III sa CCCO nga adunay Salary Grade 29.
Sumala sa Konsehal nga suportado niya ang katudloan ni Babia apan buot niyang mangayo og katin-awan kon unsa ang referensya ug kon aduna bay balaod nga gibasihan sa salary grade sa maong posisyon.
Gipasabot ni Calizo nga aron malikayan ang bikil diha sa pag-aprobar niini, angayan lang masayran ang mga referensya nga gibasihan hinungdan siya misugyot nga mahatagan ang konseho sa kopya niini.
Hinoon, gipasabot ni Calizo nga suportado niya ang maong lakang apan boot lang niya nga matubag unta kini aron malamdagan ang tanan.
Niini, gidsuso ni Bise Rodriguez ang maong lakang ngadto sa komite sa edukasyon ubos ni Konsehal Suzette Daba alang sa dugang aksyon ug rekomendasyon. (JRGalano/SP)
Si Konsehal Joey Abbu, Jr., chairman sa komite sa labor and employment, kusganong misugyot nga matubag sa mga hintungdang personalidad sa City Hall nga nalambigit sa giingong mga pundo sa programa sa basura sa dakbayan.
Kini ang gibutyag ni Abbu agi'g reaksyon sa taho ni Konsehal Ian Achas atol sa sesyon nga gidumala ni Bise Mayor Bebot Rodriguez kabahin sa Sanitary Landfill sa syudad.
Si Abbu misugyot usab nga mahatagan sila sa kopya sa rekomendasyon sa CLENRO ug ang ilang mga tubag sa DENR-EMB show cause order.
Si Abbu misugyot usab nga maimbitar ang maong mga personalidad aron mahatagan og katin-awan ang isyu mahitungod sa pundo alang sa implementasyon sa maong proyekto atol sa umaabot nga tigom sa komite sa environment ubos ni Konsehal Roger Abaday. (RNQuiblat/SP)