KUSGANONG gisugyot ni Konsehal James Judith, chairman sa komite sa arbitration, nga madeklara nga Liberation Day ang May 12 matag tuig agig paghamdom sa ika-80 ka tuig nga pagsaulog sa Philippine Veterans Affairs Office (PVAO) diin nasakmit nato ang kagawasan pinaagi sa pakigbatok sa mga Hapon.
Kini ang unod sa special report ni Konsehal James Judith atol sa sesyon niadtong Lunes nga gidumala ni Presiding Officer Pro Tempore Konsehal Romeo Calizo.
Sumala ni Judith nga dili tiaw ang sakripisyo sa atong mga veteranong Pilipino ug walay gipangayo nga bugti sa ilang pakigbisog, busa angayan lang suklian pinaagi sa pag-ila sa ilang bayanihong kaisog.
Siya midugang nga ang buhatan sa PVAO mipasabot nga aron malakip ang dakbayan sa pag-ila sa maong kasaulogan, kinahanglan nga maduso-an og resolusyon sa konseho sa syudad.
Nunot niini gisugyot ni Judith nga maduso kini sa komite sa turismo ni Konsehal Jay Roa Pascual alang sa dugang deliberasyon ug pagsumite sa uban pang gikinahanglang rekisitos alang sa nasangpit nga katuyuan.
GISUPORTAHAN ni Konsehal Bernie Esparcia ang lakang nga palapdan ang impormasyon sa pagpatuman sa Kadiwa ng Pangulo, usa ka programa nga maghatag kahigayonan sa mga mag-uuma alang sa kasayon sa pagbaligya sa ilang mga abot ug kahigayonan sa katawhan nga makapalit sa mga produkto sa ubos nga presyo.
Kini human gituki sa komite sa trade and commerce sa miaging adlaw nga gidumala ni Konsehal George Goking ang gisugyot nga ordinansa sa pagpahigayon sa KNP matag bulan subay sa Memorandun Circular No. 2024-003 sa Department of the Interior and Local Government.
Sumala ni Esparcia nga importante kaayo ang pagpakatag sa impormasyon ug pagpromote sa maong programa aron nga mapahibalo ang katawhan sa maayong programa sa gobyerno.
Matod ni Esparcia nga bisan ang dagkong mga kompanya dili gahunong og pag-advertise sa ilang mga produkto tungod dili mahimo kausa lang kini himoon mao nga aron nga makab-ot ang tumong sa Kadiwa ng Pangulo, gikinahanglan ang halapad nga information drive sa maong programa.
Niini, ang komite mimugna og Technical Working Group (TWG) alang sa maong katuyuan nga pangulohan ni Esparcia. (JRGalano/SP)
TUKION sa tigom karong alas 10:00 sa buntag diha sa hawanan sa konseho sa komite sa cultural communities ni Konsehal Roberto Cabaring ang sugyot ordinansa nga giduso ni Konsehal James Judith, II nga may kalabotan sa paggamit sa tradisyonal nga paagi sa paghusay sa panaglalis sa mga Lumad nga tawagon isip “IP Alternative Dispute Ordinance”.
Tipik usab sa komite ang sulat ni Datu Saliksik, Pangabagang Datu sa Nahilaran Dansolihon Ancestral Domain sa mga Higaonon Dansolihon Tribal Council ug Clan Representatives.
Niini, gidapit sa komite sa pagtambong sa maong tigom aron madungog ang ilang mga hunahuna ug opinyon sila si City Administrator Atty. Hilario Roy Raagas, City Legal Officer Atty. Kenneth Tamala, City Social Welfare and Development Officer Anecia Tongson, Acting City Budget Officer Roxanne Mae Ravidas ug uban pang mga dinapit.
Gipaabot usab nga motambong sa tigom sila si Konsehal Jay Pascual, Bernie Esparcia, Malou Gaane, James Judith,II, Edgar Cabanlas, Christian Rustico Achas ug Bise Mayor Bebot Rodriguez. (RNQuiblat/SP)